لا مبرر لغيابكم عن مباريات الدوري – كورة 999

جماهير الأهلي

2026-02-27 15:56
وجه محمد الدماطي، عضو مجلس إدارة النادي الأهلي، رسالة إلى جماهير القلعة الحمراء، دعاهم خلالها إلى مساندة الفريق بقوة خلال المرحلة الحاسمة من منافسات الدوري المصري الممتاز.
وكتب الدماطي عبر حسابه الرسمي على «فيس بوك»: “حتكلم في البوست ده بصفتي مشجع أهلاوي قبل ما أبقي عضو مجلس إدارة، وعارف حجم الأبواب اللي حتتفتح عليا، بس أنا مش بعرف استخبي مهما كان درجة عدم رضاك عن الإدارة أو الفريق أو أي شيء، ده مش مبرر أبدا لضعف الحضور الجماهيري في مباريات حاسمة في الدوري”.
وتابع: “لو هي ظاهرة عامة ممكن أقول فقدان شغف، أو مشاكل مع الجمهور، لكن لما يبقي الحضور كامل العدد في ماتشات أفريقيا وعدد قليل جدا في مباريات الدوري يبقي إيه السبب، هل بنوصل رسالة للاعبين إن الدوري مش مهم، مفيش أي مبرر منطقي للتفاوت ده، ومش حندفن راسنا في الرمل ونعمل مش واخدين بالنا، كل البطولات مهمة، والتواجد الجماهيري ده لوحده بيحسن الأداء، أنا على مدار عمري كنت أكتر فترة لازم أبقي موجود فيها في المدرج والفريق محتاجني عشان يكسب”.
وأضاف“نقفل على نفسنا شهرين بس، نركز مع حاجة واحدة إننا نزق فرقتنا لقدام لحد آخر الموسم، نشجع ونروح الاستاد، ونسيب أي انتقادات على جنب دلوقتي عشان مش مهم الأشخاص، محدش حيفتكر حاجة غير البطولات في الآخر، المهم الأهلي، الأهلي وبس، ياريت الناس المؤثرة تتبنى الاتجاه ده، كل حاجة لسه في إيدينا، وإن شاء الله ربنا حيكرمنا في الآخر”.
ويستعد الفريق الأول لكرة القدم بالنادي الأهلي، بقيادة المدير الفني الدنماركي ييس توروب، لخوض مواجهة مهمة أمام زد إف سي ضمن منافسات الدوري الممتاز.